تقاسيم عَ الدارج 1/2

هالليلة حابب كون لحالي
تعي.. خليكي هون قبالي
من عيونك أنا عالدِني جيت
وما عاد فيني روح ع محل تاني

علقت، مدري إنتِ علقتي بشباكي
يل صار بيناتنا ما كان شي عادي
قصتنا لا بداية إلها ولا حتى نهاية
ولمن خفّف عنك أمرار الحصار
بكون عم فكّ حبالك عن خناقي

مين بلّش؟ ليش بلّش؟ كيف بلّش
هالسراب بالفراغ يتعمشق ويتدّلى؟
وأنا بفّيات رموشك روح اتخبّى؟
وتصفّي نظراتك طاقة ع الزمان
سفر.. وبالحقيبة يلحقنا المكان
قدر.. مكتوب بالرموز والأغاني

إنتِ تميلي ويعن أنا عَ بالي
الرقص، تفتلي ودور وراكي
تيطلع الصبح ع إيقاع هواكي
وبالنهار الطريق تكوني وعليها
أنا مشوار عم فتّش عَ دواكي

تلقيتك بعكس التيار أنا مشيت
وحَلّ التراب عنّي كِتر ما بكيت
مش ضعف.. هيك أنا قويت
ومن القاموس كلمة “الندم” محيت
لأني صرت إعرف لثواني طير
وين ما رحتي رح ضلّ شوفك هيك
وابعتلك سلام مع النجوم عن بعيد
تتضلّي بأمان.. شو بسوى أنا بلاكي؟

Advertisements

الأوسمة:

7 تعليقات to “تقاسيم عَ الدارج 1/2”

  1. نبيه Says:

    استاذ حسين الغالي

    حسين.. رهجة … طالعة بعز الضهر
    وعيون .. شـــارب من مغازلها الدهر

    الرهجة … شــعر من مقلع سنين الهوى
    والعين … ماشي الدهر عا رموشــا نهر

    ***

    ماشي بعرس .. كم لون عالدرب ســـتوا
    وكم لون ….. زهّر وانبهر فيه الزهـــر

    وكم مفرق .. تفرّق … وكم مفرق طوى
    وكم قاعدة انكســــرت وموتها قهر

    ***

    حسين هالة شـــعر عا دروب الهوا
    حسين … سـكر بيحسدو طهر الطهر

    بيهـــدر متل طوفان ما في لو دوا
    إلا محبة شـهر … والملقى شــهر

    الملقى محبــة .. والنوى عندو نوى
    والســر سرو .. والجهر عندو جهر
    ***

    وجنون عاقل خشـــبة للمسرح شوى
    بنار القصـــيدة. وطلب صهوتها مهر

    شلّع خشاب .. وكب كل المســـتوى
    وصنّع لحالو مســــتوى وعملو مهر

    ****

    حسيـن غنية .. وإذا صوتو دوى
    بالحب .. بدو يبهر العـــــالم بهر

    حسـين .. كيف ما الشـعر بالعقل اكتوى
    بيضل بي …. وابن بي الموهبــــة
    وبيضل شــــــعرو يوهر العالم وهر

    • حسين رمّال Says:

      نبيه تقول خجلتني هيدا قليل
      كبرّتني وهيدا لأنك حدا كبير
      مش رح اقدر جاري شعرك
      يخليك هالطيب والأمير

      شكراً عنجد كتير، مش عارف شو قول بعد هالكلام الجميل
      بمحبتك يا غالي.. ولما يكون الحكي طالع من قلبك.. كل شي بيصير

      ع عبكرا خيي نبيه

      • salimallawzi Says:

        لو بملك حكم الدني لحظة
        ل فرجيكِ الجنون ب عينيكِ
        وخلي بنات العرب
        إيديهن بإسمك يحنّوا

        وتلف تنانير الغجر
        زخرفات من رموشك
        وع خصرك ينحني
        أبو زيد وعنتر يصلّوا

        ع خيمة هــ العمر فوتي
        وارتمي بجسمك ع تختي
        و يهب الهوا يوعّي الحواس
        و احلامك ع صدري يجنّوا

        بعدن بيسألوني لمين هــ الغنيّة
        وليش ريحتها متل حبّ الهال
        إلتلّن، هي للشعر مثال
        وبحروف صوتك غنانيّة، إعتنوا

  2. salimallawzi Says:

    Hassoun .. Check this Also Sadi2i:

    حبنا محفوظ متل الورد بالمزهرية
    الشوكة مش وردة جوريّة
    الشوكة، ندبة منسيّة
    ع جسد قصيدة رومنسيّة
    هيدي مش دعوة سرية
    هيدا حبّنا المخبى بقلوب البشرية

    نسمة هوى شمالية
    ع نسمة جنوبية
    بتوصل النشوة للسرعة القياسية
    ومنفقد معها العذرية
    ومنصير بعيون البشرية
    إخوة نحنا والخطيّة

    بدي أنطرك تحت الدراج المخفية
    تخبرك أحلى خبرية
    عن علاقتنا المنسية
    بين وراق العليّة
    وبوّس شفاك الخمرية

    وينك يا هل صبحيّة
    طلّي علينا من عشيّة
    نحنا يلي سمونا ولاد الخطية
    ما منغلط وحيات الأيقونة العجائبية
    وكل المعجزات الإسلامية

    إلك من قلبي أحلى بوسة إلحادية
    معمّدة بالرحمة إلاهيّة

    • حسين رمّال Says:

      شو هالحلا أبو السلم، افهش متلها تطلع الأشيا هيك بعفوية
      خفيفة، رقيقة متل الغمازات ع خدود الصبية
      لو كل الحكي كان هيك
      كانت قديش كانت هالدني هنية

      تحياتي القلبية صديقي

  3. Kenan Alqurhaly Says:

    روعة حسون والله روعة وكماني قوية من أخونا سليم هالابداع روعة منكم ع هالمسا

    • حسين رمّال Says:

      شكراً كنان، يخليلي إياكي صديقي، متل ما كنت عم قول ل سليم
      افهش أصدق وأطيب من العفوية هيك.. قول إنت سيد العارفين صديقي، كتابات هالجرئية ابتخلينيش ضيف شي
      بكل الأمان يا طيّب ويسعدلي مساك وكل أوقاتك إنت وأبو السلم، نبيه، كل الشعب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: