شغلات ع السريع

31 كانون ثاني 2011

مشكلة!
لما بتسمع أصوات بتنادي بإستبعاد رجال الدين عن السياسة كرمال السياسة، بس ما بتسمع بأصوات بتنادي بإستبعاد رجال الدين عن السياسة كرمال الدين!

هدية
لما تهدي شي لحدا، عيب تطالب فيه، حتى لو كنت إنت الهدية، لازم تسكت!

بداية النهاية
لما بتفكّر انو هيدا الشي بطّل ممكن يكون في شي أحسن منّو، بتكون بداية نهايتو، أي شي (فكرة، نظام، أو حتى الصبّاط)!

11 تشرين ثاني 2010

سحقاً للتوصيات
خود هيدي بقى: قال شو اوعى يا شاب تحب بنب أكثر ما هيّ بتحبك! بس بشو بتقيس؟ بالكباية أو بالمعلقة؟ وبلكي المسطرة ما كفّت؟!

واللعنة على النظريات
ايه وشو يعني، نظّرنا وعرفنا شو صار وليش صار وكيف صار ويمكن شو رح يصير وكيف رح يصير…وزايدنا ونقصّنا وضربنا وطرحنا… وبعدان؟

وتباً للمقولات
كلها ما بتنفع أمام ذرة إحساس حقيقية! وشو يعني انو مكيافلّي مثلاً قال انو أصعب شي هو انك تغيّر شي، شو استفدت مثلا. وشو يعني إذا قالت ناتالي انو الشوكولا طيّب؟

وللمعارف كلها وللفهم في حدّ ذاته
أهلين بحضرتك!

ما كلّو رايح
أو عندك اعتراض؟

4 نوفمبر 2010

أمل
مبلى غصب عن الدنيا كلها بعد في أمل وإذا ابدكنش تصدّقو اصطفلو.
مش كلّ مرّة بتروح لتنام فيها بالعتم بيفلت الزمن والمطرح منّك وبترجع الصبح بتفيق بتلاقي الشمس طالعة؟ في شي مرّة قدرت تحس بالوقت وبالمكان انت ونايم؟ في شي مرّة قدرت تمنع اللحظة يلّي بتجي قبل ما تغفى وبتفل وقت ما توعى انها تجي؟ عوافة!

سلبة
في ناس هوايتهم بهل الحياة انو يعرفو شو في براس هل العالم، اي هولي الناس سلبة، بحب ومن كل قلبي خبّركم انو مش رح فيكم تعرفو، كرمال بالوقت يلّي انتو عم تبذلو مجهود عشان تعرفو شو في براس العالم، رووس العالم بتكون تغيّرت (فات عليها شغلات وخرج منها اخرى). موفقين!

نصيحة
بدل ما تكون غبرة ع صباطو، روح امشي مطرح ما مشي صباطو. حتّى يلّي لابس الصباط اصلاً ما بيحب ولا بيطيق الغبرة ع صباطو. روح اسألو!

إذا شي
أي شخص بيقوم بأي عمل وما بيستفيد منو بشي، بيكون العمل مش منيح. شو صاير عليك!

بورنو  لكل الأعمار
أي شخص بيعمل اي عمل وبيعرضو ع العالم ضروري جدا انو يحذّر  ويعتذر من العالم لأن عملو رح يأثر عليهم (سلباً و|ام ايجاباً) وأيضاً يشكرهم كرمال أخد من وقتهم. وبأسرع وقت!

مممم
بتعرف ليش العالم كلها بتقول نفس الشي وبتلاقيهم بيعملو كل واحد شي ؟ ايه بس، كرمال بيسمعو بعض اكتر ما بيسمعو حالهم. قال شي قال!

حرام ـ ي
بس تكون عم تغصب تعصر وتشّد ع حالك كرمال تعطي، ايه بتكون عم تسرق وعم تاخد اكتر من يلّي عم تعطيه. اشفق ع حالك

قصة حب أم حب قصة؟
من كتر ما كان عنا قصص حب معقدّة، كل مرّة بس بدنا نحكي عنها لهيدي القصص كنا نروح نستعير كلمات ما خصّها بالموضوع تنوصف الحالة، صرنا نحط الكلمات بمطارح مش معمولة كرمالها، كلمة كبيرة بمطرح صغير نزركها زرك، وكلمات صغيرة بمطرح كبير تقعد تفتل ويهر منها حروف بالمطرح الفاضي.
اليوم بطلنا نعرف نحب ببساطة، متل كأنو لازم تكون قصص الحب فيها هيك كلمات وهيك مصطلحات وهيك حالات.
…لو سمحني ماديموازيل إذا بدّك نبقى مع بعض لازم يكون في قصة والاّ بعتذر منّك أوي

بيحقلّك تحلم
ما دام بالليل بس ما تكون هون بتجيك أحلام وكوابيس متلك متل غيرك
وما دام بالنهار في ناس عم  تعمل  (و/أو عم يجيها) كوابيس
ليش إنت ما بتحلم بالنهار؟ باك شي؟
إذا ما تحقق حلمك اليوم بيتحقق عبكرا
وإذا ما تحقق هون بيتحقق هونيك
ما بيكلّفك شي الحلم ع فكرة! حتى عيونك فيك تغمضهم
مش بكرا تجي تقلّي يا ريت حلمت.

حبيب قلبي مشتقلك وينك مش عم تبيّن؟
آه أوكيه،
إنت عندك واحد بتشوفو احسن واحد
وهيدا الواحد عندو واحد بيشوفو أحسن واحد
وهيدا الواحد عندو واحد بيشوفو أحسن واحد
وهيدا الواحد بيشوفك إنت أحسن واحد
إنت هلّق متل مين حابب تكون، متل أي واحد؟
أم متل حالك؟!
تعى تخبّرك هل الخبرية،
في مرّة كنت بعرف واحد وهيدا الواحد كان عندو واحد بيشوفو أحسن واحد وحابب يصير متلو، بلّش كلّ يوم يقرّب ويعمل متلو، لحدا نهار وصل لعندو واختفى بطّلت شوفو. مشتقلك!!

ريحة حريق
ليك يا قباري، ما تسكت كرمال ما ينحرق قلب حدا عليك، ساعتها يلّي احترق قلبو عليك رح بيحرقلك قلبك، وبيحرقك كلذك على بعضك… اوعك تسكت!

بتستاهل
إذا فعلاً حاسسك حالك مظلوم، ايه بستاهل وهيدا خرجك، لأنك سكتت بيوم من الايام… مش بعد شهر تفجر، رح بتقتل حالك ساعتها ورح بتقتل اشخاص ما الهم خصة لا دخل ولا خرج!

>>> يتبع

شو قلت
يا خيي طالما حابب توصلي فكرة انّك بريئ، ليش بدّك تعمل حكيم؟ ابيظبوش التنين مع بعض! نقّي وحدة (اذا فيك) وبعدان عن راسي من فوق بحطّك.

ابدهاش زهورات
طالما بنظرك في عهر بالسياسة، وطالما بعدك مصّر انّك تتابع السياسة، ف من الطبيعي راسك يوجعك. كان بودّي اتمنالك السلامة بس مش حابب اضحك عليك.

له يا رجل اتنزعهاش
ليك يا تقبرني، اذا انت مش مع هولي ولا مع هوليكي ومقتنع انّك على حق علشان التنين عندن اغلاط، أنا بهنيّك من كل دغاديغ قلبي، بس ما بيسوى تضلّك قاعد فوق، خليك متواضع خيي كرمال يقدرو يوصلو لعندك يلّي حابين، اتصعبهاش عليهن، ولو مش انت هيك بدّك؟! طيّب يلا.

بالإذن من المسيح
طبطب ع كتفك الشمال بإيدك اليمين وقول لحالك برافو يا أنا
اضرب كتفك الشمال بإيدك اليمين وقول لحالك يا عيب الشوم يا أنا
اعطي حالك قيمتها، واثق فيها، علّي راسك شوي، ايه منيح هيك بس ل أوّي
امشي، ممتاز
حب حالك، رائع
… هلّق صار فينا نحب بعضنا البعض

الف طريقة وطريقة لترتاح
1 ـ قول كل شي بقلبك وما تخلّي شي

1001 ـ قول كل شي بقلبك وما تخلّي شي، واذا ما ارتحت تعى سحسحلي

حرية/حبيبة
ما تفتكرها كلها الك وحدك وما تحبسها بقلبك وتسكّر عليها، أعطيها نَفس، خلّيها تطير… إنو كيف بتحب تكون حر وانت حابسها بقلبك؟ ولو يا شريك!

كُن، أنت !
هيدي الشغلات الموجودة، رح تبقى فيك ومن عداك، كون انت بشغلاتك انت، واترك كل شي مش ل الك مطرحو واذا بيهمك تحافظ عليه ما تقرّب عليه انت ساعتها ما حدا رح يقرّب صوبو. كون انت بفكرك انت، كون انت بنتاجك انت. لك ما بتستحي بشغلات حاملها ع كتافك وهيي مش تعولتك؟ رح تهدّك هيدي الشغلات لأن صاحبها مش مبسوط منّك بنوب لما عم تاخدها منو وخاصة لما ما بتعرف تستعملها، عم تنزعلو اياها. رح بتضلّك ضايع طالما مخبى ورا اشيا مش الك وبدّك تفرجيني ع حالك من خلالها… يلا ولو اسرع كبّ كل شي وتعى سملح (لعبة الغميضة)!.

هوا شرقي كلّو رمل
لما الرجل الشرقي بيروح بينقّي صبيتو وبدّو ما يكون بايس تمها الا امها بيكون ما عندو ثقة كافية بحالو لأن ما بدّو صبيتو تكون بتعرف شي وهيك اي شي بيعملو (بالفرشة او برات الفرشة) ما رح تلاقي صبيتو اي مقابل للمقارنة … وبدّو عطول يطلع ـ او ينزل ـ هو وحدو يل بيعرف وانو يل بيعملو هو أحسن شي بينعمل أو انعمل… انت واحد مش رجال عمو وهواك كلو رمل بيعمي العيون…

شريعة الإنسان
ما فيها واحد قوي شوي وواحد تاني قوي وسط وواحد ثالث قوي ع الريحة، فيها واحد بدّو يكون هو وحدو القوي وبدّو يضل اقوى الشي كمان، كرمال هيك الضعفا بتلاقيهن بيحاربو حالن لأن كل واحد فيهن بدّو يكون ولحالو هو القوي محل هضاكي القوي بس أبصر (أو مدري) ليش بيستحو يقولوها. وهياهن بيضلهن ضعاف بحروبن مع الضعاف يل متلن والقوي بيبقى قوي لحتى هو يزهق…

طبيعي يا خيي
في مرّة واحد من الشعب المتضرر من الوضع، قام راح صار يفكّر ويحلل، وبعدان وجد حل للأزمة يلّي عايشها هو ويلّي متلو، بس استغرب لما هاجمو يلّي مش متضرر من الوضع. قال شو واحد عايش ورواق وبيجي التاني بيقلّو معليش رح تتعب معنا شوي ومنصّفي بعدان متل بعض!

مين قال انو قبل كان أحسن، هه!؟
جدّك أو كتاب التاريخ؟ قال قبل كان أحسن قال، ع فكرة هيدي مؤامرة قامو فيها جدودنا مدري عن أنانية، مدري عن لاوعي، بس كرمال بيغارو منا لما بيشوفونا ع الإنترنت وهيك شغلات، وهيك تيخربولنا عيشتنا وما يمشي حالنا وما نقدر نعمل أحسن منهن.

بس بدّك تعبّر
لازم، قبل ما تعرف عن شو بدّك تعبّر، تعرف لمين بدّك تعبّر وكرمال شو : عن حالك؟ لحالك؟ كرمالك؟ عن حالكن؟ لأحوالكن؟ كرمالكن؟ عن حالهن؟ لأحوالن؟ كرمالهن؟… عم تسأل حالك هيك شغلات؟ بقوسي كمشتك!

ما كنت بعرف
انو ع قد ما أنا مؤمن ومقتنع وشايف انو صح الشغلة يلّي عم قولها وعم اعملها … في حدا بالميلة التانية ع قدّي مؤمن ومقتنع وشايف انو صح الشغلة يلّي هو عم يقولها وعم يعملها…

بيقولو بالطب
إنو اذا حدا اكل شي من أرضو وسببلو مرض ما رح بيكون أفضل دوا من ذات الأرض، وأنا بقول لما أي مشكلة بتصير بمكان ما أفضل حل رح بيكون من نفس المكان وأي شي جايي من مطرح تاني مش رح يكون الحل ولا أفضل حل.

حرب تموز 2006
علمتني أهم شغلة بحياتي، انو ع قد ما كنت بعرف، وع قد ما كنت بفهم وع قد ما كنت بملك حلول وأعظم الحلول… كل هالأشيا بالراس والفكر بتبقى بلا طعمة قدام دعسة قدم مقاوم ع الأرض… وعرفت وقتها قديش بكون صغير وقديش بتفرق الأشيا بين النظريات وتطبيقها.

>>> يتبع

8 تعليقات to “شغلات ع السريع”

  1. hanibaael Says:

    مبروك

    جميل شوفك بفضاء التدوين.. هيك بتصير زميل كمان
    😛

  2. Lamees Says:

    خيــال جميــل و ابداعات جديدة .. لربمـا وصلت حدود الفلسفة الفكريـة و مدارسهـا
    رائـع ، سأظل أتابع 🙂

    تحيــاتي
    لميــس

  3. Nabih Says:

    raw3aaaaaaaaaa 2stazna wala raw3a

  4. hrammal Says:

    يا هلا نبيه، قال وأخيراً طليّت، شاعرنا
    لازم انت تعمل صفحة الك ولشعرك، هيك بتصير زميل كمان
    بكل الأحوال منتحاكى قريباً
    كون بأمان وسلام
    تحيات

  5. محمد Says:

    فكر عميق

  6. achraf Says:

    شي رائع دكتور …..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: